امریکی عوام وائٹ ہاؤس کی بوئی ہوئی فصل کاٹنے کے لئے تیار ہوجائیں: اسامہ کا ویڈیو پیغامدبئی (ثناء نیوز)القاعدہ کے سربراہ اسامہ بن لادن نے کہا ہے کہ اوباما انتظامیہ نے امریکہ کے خلاف نفرت کے بیچ بوئے ہیں ۔ امریکی عوام وائٹ ہاؤس اور امریکی لیڈروں کی مسلم دشمنی کی بوئی ہوئی فصل کاٹنے کیلئے تیار ہوجائیں امریکی صدر بارک اوباما کے پاس عراق اور افغانستان کی جنگیں روکنے کا اختیار نہیں ہے ۔ بش دور کے وزیر دفاع رابرٹ گیٹس اور جنگی پالیسیوں کا جاری رہنا براک اوباما کے بے اختیار ہونے کا ثبوت ہے۔ اب اگر امریکا بھی جنگ جاری رکھتا ہے تو اس کیخلاف آخری حد تک جائیں گے۔شدت پسند تنظیموں کی ویب سائٹس کی نگرانی کرنے والے امریکی ادارے سائٹ انٹیلی جینس گروپ کے مطابق القاعدہ کے سربراہ نے یہ بات القاعدہ میڈیا شاخ الصہاب کی ویب سائٹ پر اپنے نئے ویڈیو پیغام میں کہی۔ گیارہ منٹ پر مشتمل ویڈیو میں اسامہ کی تصویر ہے اور بیک گراؤنڈ میں ان کی آواز کی ٹیپ چلائی گئی ہے ۔ سائٹ انٹیلی جینس گروپ کے مطابق اسامہ بن لادن کا پیغام امریکی عوام کے لئے ہے ۔ ان کا کہنا ہے کہ عراق اور افغانستان کی جنگوں کی ذمہ داری اسرائیل نوازلابی اور بین الاقوامی کاروباری مفادات رکھنے والوں پر ہے ۔ اسامہ بن لادن نے کہا کہ امریکی صدر بارک اوباما ان جنگوں کو روکنے کا اختیار نہیں رکھتے ۔ اوباما اور ان کی انتظامیہ بھی ماضی کی طرح ایجنسیوں اور یہودیوں کے اشاروں پر چل رہی ہے جس کے باعث وہ اس قابل نہیں کہ امریکی حالات کو سدھارسکیں اور عراق اور افغانستان کے دلدل میں پھنسی امریکی فوجوں کو نکال سکیں۔ پیغام میں القاعدہ کے سربراہ اسامہ بن لادن نے امریکی عوام کو مخاطب کرتے ہوئے کہاہے کہ اوباما انتظامیہ نے امریکہ کے خلاف نفرت کے بیچ بوئے ہیں ۔ انھوں نے کہا کہ مستقبل میں امریکی عوام وائٹ ہاؤس اور امریکی لیڈروں کی مسلم دشمنی کی بوئی ہوئی فصل کاٹنے کیلئے تیار ہوجائیں ۔ اسامہ بن لادن نے صدر براک اوباما کو بے اختیار قراردیتے ہوئے کہا کہ وائٹ ہاؤس تنگ نظر پریشر گروپوں کے قبضے میں ہے۔ جارج ڈبلیو بش عراقیوں کو آزاد کرانے کا کہتے تھے حالانکہ امریکی عوام کو چاہئیے کہ وہ وائٹ ہاؤس کو آزاد کرائیں۔اسامہ نے خبردار کیا کہ روس کے ٹوٹنے تک اس کیخلاف جہاد جنگ جاری رکھی گئی۔ اسامہ نے کہا کہ براک اوباما اتنے بے اختیار ہیں کہ افغان جنگ تک ختم نہیں کرا سکتے۔وائٹ ہاؤس صدر بش کی پالیسیاں جاری رکھتے ہوئے امریکیوں کو خوف دلا رہے ہیں تاکہ بڑی کمپنیوں کے مفادات کا تحفظ کیا جاسکے۔ اسامہ کا کہنا تھا کہ بش دور کے وزیر دفاع رابرٹ گیٹس اور جنگی پالیسیوں کا جاری رہنا براک اوباما کے بے اختیار ہونے کا ثبوت ہے۔ اب اگر امریکا بھی جنگ جاری رکھتا ہے تو اس کیخلاف آخری حد تک جائیں گے۔ اسامہ بن لادن کا یہ نیا پیغام امریکا میں گیارہ ستمبر کے حملوں کے آٹھ سال مکمل ہونے کے دو دن بعد منظر عام پر آیا ہے

بیجنگ ( ثناء نیوز) چین میں خاتون کے گھر سے ایک ٹانگ والا انوکھا سانپ دریافت ہوا ہے ۔ رپورٹس کے مطابق یہ سانپ چین کے جنوب مغربی حصے میں سڑسٹھ سالہ خاتون مسز ڈین کون زو کے گھر سے دریافت ہوا۔ مسز ڈین کا کہنا ہے کہ وہ اپنے گھر میں لیٹی ہوئی تھیں کہ انہوں نے پراسرار آوازیں سنی۔ انہوں نے آواز کا تعاقب کیا تو ایک دیوار پرانہیں یہ سانپ چڑھتا ہوا نظر آیا۔ سانپ کی لمبائی انیس انچ ہے جسے یونیورسٹی آف نان چنگ کے سائنسز ڈیپارٹمنٹ میں رکھ دیا گیا ہے۔ ماہرین نے سانپ پر تحقیقات کا آغاز کر دیا ہے۔ ان کا کہنا ہے کہ دو سروں والے سانپ تو عام ہیں لیکن وہ ایک ٹانگ والا سانپ دیکھ کر حیران رہ گئے۔

پاکستان میں شرح سود میں دو فیصد کمی ہوسکتی ہے سنگاپور (نیٹ نیوز) پاکستان میں آئندہ چھ ماہ کے دوران شرح سود میں دو فیصد تک کمی ہوسکتی ہے جبکہ آئندہ سال تک انڈیکس گیارہ ہزار پوائنٹس کی سطح عبور کرسکتا ہے یہ بات سنگاپور کریڈٹ سوائس نے اپنی رپورٹ میں کہی رپورٹ کے مطابق پاکستانی سٹاک مارکیٹ میں کے ایس ای 100 انڈیکس 2010ء کے پرائس ٹو ارننگ ریشو کے اعتبار سے 8پر ٹریڈ ہورہاہے اور حصص کی قیمتوں کے اعتبار سے ایشیائی سٹاکس کے مقابلے میں 50فیصد کم پر ٹریڈ ہورہا ہے کریڈٹ سوئس نے اپنی رپوٹ میں مزید کہا ہے کہ پاکستان میں شرح سود میںکمی کا سلسلہ جاری ہے اور مستقبل میں مزید کمی کی صورت میںحصص کی قیمتوں میں تیزی سے اضافہ ہوگا ۔

واشنگٹن، لندن ( آن لائن ، مانیٹرنگ ڈیسک) امریکہ نے کہا ہے کہ وہ ان اطلاعات کو بہت سنجیدگی سے لے رہا ہے جن میں کہا گیا ہے پاکستان نے امریکہ سے ملنے والی امداد اور اسلحہ کو ممکنہ طور پر بھارت کے خلاف استعمال کیا ہے۔ سابق صدرجنرل ریٹائرڈ پرویز مشرف نے اپنے ایک تازہ انٹرویو میں کہا تھا کہ دہشت گردی کے خلاف جنگ میں ملنے والی امداد کے تحت ملنے والے جنگی ساز و سامان کے بھارت کے خلاف استعمال کے امکان کو رد نہیں کیا جا سکتا ہے۔ انہوں نے کہا کہ انہیں اس بات کی پرواہ نہیں کہ انہوں نے کسی کو دھوکہ دیا یا نہیں۔ جنرل پرویز مشرف نے کہا ہے کہ ملک کے تحفظ کے لیے پاکستانی فوج نے تمام وسائل کو ہر جگہ استعمال کیا ہے۔ گزشتہ روز امریکہ کے محکمہ خارجہ کے ترجمان ایان کیلی نے ایک سوال کے جواب میں کہا کہ امریکہ کی پالیسی یہی ہے کہ اس کی جانب سے دیا گیا اسلحہ بھارت کے خلاف استعمال ہر گز نہ کیا جائے اور امریکہ ان الزامات کو انتہائی سنجیدگی سے لے رہا ہے۔ ایان کیلی نے کہا کہ پرویز مشرف اب ایک عام شہری ہیں اس لیے انہوں نے جو کہا ہے اس کی مزید معلومات حاصل کر رہے ہیں لیکن امریکہ کی پالیسی کا جہاں تک تعلق ہے وہ واضح ہے۔ تاہم انہوں نے کہا کہ مجھے اس بات کا علم نہیں کہ اوباما انتظامیہ مشرف کے اس بیان کی تحقیقات کریگی اور نہ ہی ہم امداد کی خلاف ورزی کئے جانے سے متعلق کسی قسم کی خلاف ورزی سے آگاہ ہیں۔ ترجمان سے سوال کیا گیا کہ سابق صدر پرویز مشرف نے حالیہ انٹرویو میں کہا ہے کہ وہ امریکہ کی طرف سے فراہم کئے گئے اسلحے کو بھارتی محاذ پر لے آئے تھے اس پر امریکہ کا کیا موقف ہے ۔ ترجمان نے کہاکہ پرویز مشرف نے اپنے انٹرویو میں بہت کم تفصیل فراہم کی ہے اور ان کے بیان پر تبصرہ کرنے کے لئے مزید معلومات درکار ہوں گی ۔ جہاں تک امریکہ کا تعلق ہے تو امریکی حکومت اپنے اسلحے کو طے شدہ مقصد کے بجائے دیگر مقاصد کے لئے استعمال کرنے کے ہر الزام کو سنجیدگی سے لیتی ہے۔ دریں اثناء پاکستان نے کہا ہے کہ دہشت گردوں کے خلاف جنگ کے لئے مغربی ممالک سے ملنے والے سازوسامان کو صرف دہشت گردوں کے خلاف ہی استعمال کیا جا رہا ہے اور ہتھیاروں کے استعمال سے متعلق پاکستان کے سابق صدر مشرف کا بیان انتہائی غیر ذمہ دارانہ ہے۔ برطانیہ میں پاکستان کے ہائی کمشنر واجد شمش الحسن نے بی بی سی کو بتایا کہ ایسے موقع پر جب پاکستانی ریاست دہشت گردوں کے خلاف ایک انتہائی مشکل جنگ لڑ رہی ہے سابق صدر کا ایسا بیان پاکستان کو نقصان پہچانے کے مترادف ہے انہوں نے کہا کہ سابق صدر مشرف کا بیان مایوسی کے عالم میں عوامی حمایت حاصل کرنے کی سر توڑ کوشش ہے یہ بیان قطعاً ریاستی پالیسی نہیں ہے۔ دریں اثناء سابق صدر پرویز مشرف نے کہا ہے کہ انہوں نے ایسا کوئی بیان میڈیا کو یا کسی بھی انٹرویو میں نہیں دیا کہ امریکہ سے دہشت گردی کیخلاف ملنے والے امداد کو پاکستان کا دفاع بھارت کے خلاف مضبوط بنانے کیلئے استعمال کیا۔ واشنگٹن میں ڈاکٹر نسیم اشرف سے گفتگو میں انہوں نے کہا کہ امریکہ جانتا ہے کہ فوج کا ہر یونٹ ایک جگہ سے دوسری جگہ جاتے ہوئے اپنا سامان ساتھ لیکر جاتا ہے۔ انہوں نے کہا کہ میرے انٹرویو کو تڑوڑ مڑوڑ کر پیش کیا گیا ہے۔ میں ایک ذمہ دار آدمی ہوں اور کبھی بھی غیر ذمہ دارانہ بات نہیں کرتا۔ ڈاکٹر نسیم اشرف سے گفتگو میں انہوں نے مزید کہا کہ یہ الزام تو بھارت پاکستان پر لگایا کرتا تھا کہ امریکی امداد سے پاکستان اپنے آپ کو بھارت کے خلاف دفاعی طور پر مضبوط کر رہا ہے اور میں نے ہمیشہ بھارت کے ان الزامات کا بھر پور دفاع کیا ہے۔