واشنگٹن، لندن ( آن لائن ، مانیٹرنگ ڈیسک) امریکہ نے کہا ہے کہ وہ ان اطلاعات کو بہت سنجیدگی سے لے رہا ہے جن میں کہا گیا ہے پاکستان نے امریکہ سے ملنے والی امداد اور اسلحہ کو ممکنہ طور پر بھارت کے خلاف استعمال کیا ہے۔ سابق صدرجنرل ریٹائرڈ پرویز مشرف نے اپنے ایک تازہ انٹرویو میں کہا تھا کہ دہشت گردی کے خلاف جنگ میں ملنے والی امداد کے تحت ملنے والے جنگی ساز و سامان کے بھارت کے خلاف استعمال کے امکان کو رد نہیں کیا جا سکتا ہے۔ انہوں نے کہا کہ انہیں اس بات کی پرواہ نہیں کہ انہوں نے کسی کو دھوکہ دیا یا نہیں۔ جنرل پرویز مشرف نے کہا ہے کہ ملک کے تحفظ کے لیے پاکستانی فوج نے تمام وسائل کو ہر جگہ استعمال کیا ہے۔ گزشتہ روز امریکہ کے محکمہ خارجہ کے ترجمان ایان کیلی نے ایک سوال کے جواب میں کہا کہ امریکہ کی پالیسی یہی ہے کہ اس کی جانب سے دیا گیا اسلحہ بھارت کے خلاف استعمال ہر گز نہ کیا جائے اور امریکہ ان الزامات کو انتہائی سنجیدگی سے لے رہا ہے۔ ایان کیلی نے کہا کہ پرویز مشرف اب ایک عام شہری ہیں اس لیے انہوں نے جو کہا ہے اس کی مزید معلومات حاصل کر رہے ہیں لیکن امریکہ کی پالیسی کا جہاں تک تعلق ہے وہ واضح ہے۔ تاہم انہوں نے کہا کہ مجھے اس بات کا علم نہیں کہ اوباما انتظامیہ مشرف کے اس بیان کی تحقیقات کریگی اور نہ ہی ہم امداد کی خلاف ورزی کئے جانے سے متعلق کسی قسم کی خلاف ورزی سے آگاہ ہیں۔ ترجمان سے سوال کیا گیا کہ سابق صدر پرویز مشرف نے حالیہ انٹرویو میں کہا ہے کہ وہ امریکہ کی طرف سے فراہم کئے گئے اسلحے کو بھارتی محاذ پر لے آئے تھے اس پر امریکہ کا کیا موقف ہے ۔ ترجمان نے کہاکہ پرویز مشرف نے اپنے انٹرویو میں بہت کم تفصیل فراہم کی ہے اور ان کے بیان پر تبصرہ کرنے کے لئے مزید معلومات درکار ہوں گی ۔ جہاں تک امریکہ کا تعلق ہے تو امریکی حکومت اپنے اسلحے کو طے شدہ مقصد کے بجائے دیگر مقاصد کے لئے استعمال کرنے کے ہر الزام کو سنجیدگی سے لیتی ہے۔ دریں اثناء پاکستان نے کہا ہے کہ دہشت گردوں کے خلاف جنگ کے لئے مغربی ممالک سے ملنے والے سازوسامان کو صرف دہشت گردوں کے خلاف ہی استعمال کیا جا رہا ہے اور ہتھیاروں کے استعمال سے متعلق پاکستان کے سابق صدر مشرف کا بیان انتہائی غیر ذمہ دارانہ ہے۔ برطانیہ میں پاکستان کے ہائی کمشنر واجد شمش الحسن نے بی بی سی کو بتایا کہ ایسے موقع پر جب پاکستانی ریاست دہشت گردوں کے خلاف ایک انتہائی مشکل جنگ لڑ رہی ہے سابق صدر کا ایسا بیان پاکستان کو نقصان پہچانے کے مترادف ہے انہوں نے کہا کہ سابق صدر مشرف کا بیان مایوسی کے عالم میں عوامی حمایت حاصل کرنے کی سر توڑ کوشش ہے یہ بیان قطعاً ریاستی پالیسی نہیں ہے۔ دریں اثناء سابق صدر پرویز مشرف نے کہا ہے کہ انہوں نے ایسا کوئی بیان میڈیا کو یا کسی بھی انٹرویو میں نہیں دیا کہ امریکہ سے دہشت گردی کیخلاف ملنے والے امداد کو پاکستان کا دفاع بھارت کے خلاف مضبوط بنانے کیلئے استعمال کیا۔ واشنگٹن میں ڈاکٹر نسیم اشرف سے گفتگو میں انہوں نے کہا کہ امریکہ جانتا ہے کہ فوج کا ہر یونٹ ایک جگہ سے دوسری جگہ جاتے ہوئے اپنا سامان ساتھ لیکر جاتا ہے۔ انہوں نے کہا کہ میرے انٹرویو کو تڑوڑ مڑوڑ کر پیش کیا گیا ہے۔ میں ایک ذمہ دار آدمی ہوں اور کبھی بھی غیر ذمہ دارانہ بات نہیں کرتا۔ ڈاکٹر نسیم اشرف سے گفتگو میں انہوں نے مزید کہا کہ یہ الزام تو بھارت پاکستان پر لگایا کرتا تھا کہ امریکی امداد سے پاکستان اپنے آپ کو بھارت کے خلاف دفاعی طور پر مضبوط کر رہا ہے اور میں نے ہمیشہ بھارت کے ان الزامات کا بھر پور دفاع کیا ہے

لندن (آن لائن) سابق صدر پرویز مشرف نے پاکستان مسلم لیگ (ن) کے قائد میاں نواز شریف پر الزام عائد کیا ہے کہ وہ لال مسجد اور جامعہ حفصہ کی دوبارہ تعمیر کیلئے فنڈز فراہم کررہے ہیں ، نواب اکبر بگٹی کا مقدمہ میرے خلاف چلانے کی بات کیوں کی جاتی ہے کیا میں نے بگٹی کو خود جاکر مارا ہے اس میں سارے ادارے ، ساری فوج اور ایجنسیاں شامل تھیں کیا ان سب کیخلاف مقدمہ چلایا جائے گا ایک جریدے کو دیئے گئے انٹرویو میں سابق صدر مشرف نے کہا کہ میاں نواز شریف نے لال مسجد میں پرانے مکینوں کو لانے کیلئے پیسے فراہم کئے ہیں جامعہ حفصہ جو ناجائز قبضے کی جگہ پر قائم تھی دوبارہ تعمیر کی جارہی ہے اس میں بھی یہی لوگ پیسے فراہم کررہے ہیں انہوں نے کہا کہ اسلام آباد کی مساجد میں بڑے منتظم طریقے سے 400سے 500افراد کو رکھا گیا ہے دہشتگردوں نے ہر سیکٹر کے حساب سے پولیس کا نظام بنا رکھا ہے اور یہ وہ لاوا ہے جو پھٹنے کو ہے لیکن کوئی اس کی طرف توجہ نہیں دے رہا لال مسجد میں کئے گئے آپریشن کے حوالے سے پوچھے گئے سوال پر مشرف کا کہنا تھا کہ یہ سب میڈیا کا کمال تھا جس نے آپریشن سے پہلے ایکشن کی رٹ لگا رکھی تھی جب ایکشن ہوا تو اسی میڈیا نے ہمارے خلاف پروپیگنڈہ شروع کردیا مشرف کا کہنا تھا کہ آپ فوج کے ریکارڈ سے چیک کرسکتے ہیں لال مسجد میں کوئی فاسفورس بم استعمال نہیں ہوا اس کے آپریشن میں صرف اسموک بم ( دھواں پیدا کرنے والے بم ) اور ر مشین گن استعمال کی گئی جبکہ آپریشن کے وقت آئی ایس آئی کے 2 افراد مسجد کے اندر موجود تھے جو ہمیں ہر بات سے آگاہ کررہے تھے انہوں نے ہمیں بتایا تھا کہ اندر 100سے زیادہ لوگ موجود ہیں تاہم بعد میں عورتیں اوربچے باہر نکل آئے جس کے بعد آپریشن شروع کیا گیا آپریشن میں کل 80یا 90 لوگ مارے گئے آپریشن سے پہلے یہ بھی اطلاع تھی کہ اندر700 سے زائد غیر ملکی بھی موجود ہیں مارے جانے والے افراد میں کوئی بچہ یا عورت شامل نہیں تھے ہمیں ایک کمرے سے چند انسانی اعضاء جلے ہوئے ملے تھے اس کمرے کو خود جلایا گیا اب یہ علم نہیں یہ کون تھے اور انہیں کیوں جلایا گیا مشرف نے بلوچستان آپریشن کے حوالے سے کہا کہ اس میں حکومت فوج اور خفیہ ادارے سب شامل تھے اس آپریشن کا مقصد ذاتی عناد نہیں بلکہ اس کا مقصد پاکستان کا تحفظ تھا اس آپریشن میں میرے خلاف ہی مقدمہ کیوں چلانے کی بات کی جارہی ہے اس واقعہ کے دیگر ذمہ داروں کیخلاف بھی مقدمہ چلایا جائے ۔
پرویز مشرف