نئی دہلی (آن لائن)سیکرٹری تجارت سلمان غنی نے کہا ہے کہ پاکستان اوربھارت کے درمیان مذاکرات کی بحالی اور سیاسی ماحول کی بہتری سے دونوں ممالک کے درمیان سالانہ دس ارب ڈالر کی تجارت ہو سکتی ہے۔ گزشتہ روز یہاں پی ایچ ڈی چیمبر آف کامرس کی تقریب کی سائیڈ لائن پر صحافیوں سے گفتگو کرتے ہوئے انہوں نے کہا کہ اگر ایک بار مذاکرات بحال ہو جائیں تو دونوں ممالک کے درمیان دوطرفہ تجارت کو دس ارب ڈالر تک بنانے میں پانچ سے چھ سال کا عرصہ بھی نہیں لگے گا موجودہ سرد مہری کے دور میں دونوں ممالک کے درمیان تجارت دوارب ڈالر کی ہے ۔ انہوں نے کہا کہ یہ وقت دونوں ممالک کے درمیان تجارتی سرگرمیوں کے فروغ کا ہے اور اس کیلئے ہمیں حقیقت پسندی سے زمینی حقائق کا ادراک کرنا چاہیے۔ انہوں نے کہا کہ پاکستان تجارتی اداروں کے درمیان بہتر تعلقات کے فروغ کیلئے پر عزم ہے۔

واشنگٹن،تہرن (ثناء نیوز) امریکا نے خبردار کیا ہے کہ ایران کو لازمی طور پر یکم اکتوبرکو اپنے متنازع ایٹمی پروگرام پر عالمی طاقتوں کے ساتھ مذاکرات کرنا ہوں گے۔وائٹ ہاوس کے ترجمان رابرٹ گبزنے کہا ہے کہ امریکا نہیں جانتا کہ ایران کا ایجنڈا کیا ہے لیکن ہم اپنا اور ان ممالک کا ایجنڈا جانتےہیں جنہیں ایران کے ایٹمی پروگرام پر تشویش ہے۔ان کا کہنا تھا کہ یکم اکتوبر کوسلامتی کونسل کے مستقل ارکان اور جرمنی کے ساتھ ایران کو ہر حال میں مذاکرات کرنے ہوں گے اور اگراپنے متنازع ایٹمی پروگرام پر ایران نے بات کرنے پر رضا مندی ظاہر نہ کی تو عالمی برادری کے ایران کے حوالے سے تحفظات اور بھی بڑھ جائیں گے۔ادھر امریکی محکمہ خارجہ کے ترجمان آئن کیلی کا کہنا ہے کہ سلامتی کونسل کے عالمی طاقتیں اس بات پر متفق ہیں کہ ایران کو اپنے جوہری پروگرام کو مزید شفاف بنانا ہوگا،اگر ایسا نہ کیاتواسے مزید پابندیوں کا سامنا کرنا ہوگا، ایران نے ایٹمی تنازعے پر چھ عالمی طاقتوں سے مذاکرات شروع کرنے کیلئے آمادگی کا اظہار کردیا ۔غیر خبر رساں ادارے کے مطابق یورپی خارجہ پالیسی کے سربراہ ہاویئر سولانا نے ایران کے جوہری مذاکرات کار سعید جلیلی سے ملاقات میں ایٹمی پروگرام پر مذاکرات کرنے پر رضا مندی کا اظہار کردیا ہے ۔مذاکرات میں روس ،چین ،جرمنی ،فرانس ،برطانیہ اور امریکا کے سفارتکار شرکت کریں گے ۔واضح رہے کہ ایران نے چھ عالمی طاقتوں کو ایک پیکیج پیش کیا تھا جس میں عالمی مالیاتی بحران سمیت مختلف معاملات پر مذاکرات کی دعوت دی گئی تھی لیکن اس میں ایٹمی تنازعے کو نظر انداز کردیا گیا تھا

واشنگٹن ( ثناء نیوز ) گزشتہ برس 2008 ء میں دنیا میں فروخت کیے گئے کل ہتھیاروں میں سے دو تہائی سے بھی زائد اسلحہ فروخت کرکے امریکہ اس میدان میں سرفہرست ہے ۔ اس سال ہتھیاروں کی بین الاقوامی فروخت تین برسوں کے مقابلے میں سب سے کم رہی۔ جمعہ کے روز جاری کردہ ایک پارلیمانی جائزہ کے حوالے سے ’’ نیویارک ٹائمز ‘‘ نے کہا کہ ہتھیاروں کی بین الاقوامی فروخت میں امریکہ کی حصہ داری 68.4 فیصد رہی ۔ سال 2008 ء میں امریکی ہتھیاروں کی فروخت میں 50 فیصد کا اضافہ ہوا ہے ۔ رپورٹ کے مطابق اس فہرست میں دوسرا مقام اٹلی اور تیسرا مقام روس کو ملا ہے ۔ اٹلی نے 2008 ء میں جہاں تین ارب 70 کروڑ ڈالر کے ہتھیار فروخت کیے وہیں روس نے اس سال تین ارب 50 کروڑ ڈالر کا اسلحہ فروخت کیا ۔ رپورٹ میں بتایا گیاہے کہ ترقی پذیر ملکوں میں متحدہ عرب امارات اسلحہ کی خریداری کرنے والے ملکوں میں سر فہرست ہے جس نے گزشتہ برس 9 ارب 70 کروڑ روپے کے ہتھیار خرید ے تھے۔ دوسرے مقام پر سعودی عرب رہا جس نے 8 ارب 70 کروڑ ڈالر کا اسلحہ خریدا جبکہ مراکش 5 ارب 40 کروڑ ڈالر کا اسلحہ خرید کر تیسرے مقام پر رہا۔

تہران (آن لائن) ایران کے ستائیس سائنسدانوں کودینا بھر کے سو ممتاز ترین سائنسدانوں کی فہرست میں شامل کرلیا گیا ہے ملکی میڈیا رپورٹس کے مطابق انسٹی ٹیوٹ فار سائنٹیفک انفارمیشن نے ایران کے مختلف شعبوں سے تعلق رکھنے والے ستائیس سائنسدانوں کودنیا بھر کے سو ممتاز ترین سائنسدانوں کی فہرست میں شامل کرلیا ہے فہرست میں ممتاز رضا گانجالی کو اڑتالیس ویں نمبر پر رکھا گیا ہے

نیویار ک ( آن لائن) نیو یار ک پولیس اور ایف بی آئی پر مشتمل انسداد دہشت گردی سکواڈ نے نیو یارک کے رہائشی علاقے کوئینزا میں دہشت گردی کی مبینہ سرگرمیوں کی تحقیقات کیلئے مختلف گھروںپر چھاپے مارے ہیں۔ میڈیا رپورٹ کے مطابق نیو یار ک کے پولیس کمشنر پال براؤن نے بتایا کہ دہشت گردی کی مبینہ سرگرمیوں کے خلاف آپریشن کا آغاز گزشتہ رات ہوا جس کے تحت مختلف گھروں پر چھاپے مارے جا رہے ہیں تاہم پال براؤن نے آپریشن کی مزید تفصیلات بتانے سے گریز کیا اور کہا کہ یہ آپریشن مقامی پولیس اور ایف بی آئی پر مشتمل انسداد دہشت گردی اسکواڈ کی طرف سے کیا جارہا ہے اور اس کی تحقیقات کے بارے میں امریکی کانگریس کی رپورٹ پیش کی جائیگی۔

واشنگٹن (آن لائن) امریکی حکومت کے اہم ادارے ڈائریکٹر آف نیشنل انٹیلی جنس اوپن سورس سنٹر نے پاکستان کے نیوکلیئر سائنسدان ڈاکٹر عبدالقدیر خان کے 31 اگست 2009ء کو ایک پاکستانی نجی ٹی وی پر نشر ہونے والے انٹرویو کی انگلش میں ٹرانسلیشن کی ہے جسے امریکہ کی طلباء نیوز ایجنسی سکریرسی نیوز آف فیڈریشن آف امریکن سٹوڈنٹس نے حاصل کیا ہے امریکہ کے اس اہم ادارے نے نائن الیون کمیشن رپورٹ کی تیاری میں بھی معاونت کی تھی ڈاکٹر خان کے اس انگریزی ترجمہ کو بھارتی خبررساں ادارے نے اپنی ویب سائٹوں پر نشر کیا ہے بھارتی خبررساں ادارے کے مطابق انگریزی میں ترجمہ کئے گئے انٹرویو کے مطابق ڈاکٹر عبدالقدیر خان کا کہنا ہے کہ ہم نے کارگل جنگ کے دوران شمالی کوریا سے 200 میزائل خریدے تھے انگریزی ترجمہ کے مطابق ڈاکٹر قدیر نے اپنے انٹرویو میں مزید کہا کہ دبئی میں مقیم سری لنکا کے مسلمان گروپ پاکستان ، ایران اور لیبیا کو نیوکلیئر مواد اور آلات سپلائی کرتا تھا وہ یہ چیزیں تھرڈ پارٹی سے لیکر دیتا تھا انہوں نے بتایا کہ دبئی میں اس کمپنی کا اس وقت قیام کیا گیا جب یورپ سے ہمیں یہ مواد نہیں مل رہا تھا انہوں نے کہا کہ اس وقت ایرانی حکام نے دبئی میں اس سپلائیر سے ملاقات کی اورہم نے انہیں یقین دلایا ہ یہ ذریعہ انتہائی قابل اعتماد ہے ہم نے ایران کو ہدایت کی کہ وہ اس ذریعے پر بھروسہ کرکے آلات کی خرید کرسکتا ہے انہوں نے اس بات کی تردید کی ہے کہ پاکستان نے میزائل کے بدلے شمالی کوریا کو کسی قسم کی نیوکلیئر ٹیکنالوجی منتقل کی ایک سوال پر ڈاکٹر عبدالقدیر خان نے کہا کہ 1999 ء میںجنرل مشرف نے اس وقت کے چیف آف ائر ڈیفنس کمانڈ جنرل افتخار کو میرے ساتھ شمالی کوریا بھیجا اس وقت ہم کارگل جنگ لڑ رہے تھے اور مشرف نے کہا تھا کہ ہمیں میزائلوں کی اشد ضرورت ہے ہم دونوں شمالی کوریا گئے اور ان سے دو سو اینٹی ائرکرافٹ میزائل خریدے انہوں نے بتایا کہ اس عرصے کے دوران شمالی کوریا کی ٹیم نے کہوٹہ پلانٹ کا دورہ کیا تھا اور یہ کوئی خفیہ نہیں تھا سب اس بارے جانتے تھے